જમાનાની રોકી લો વણઝાર....{ ફુલો વેરાણાં ચોક માં }

 (રાગ-પગ મને ધોવા દો રઘુરાય)

 

    જમાનાની રોકી લો વણઝાર, 

રોકી લો વણઝાર, ખોલી નાખો માનવતાનાં દ્વાર ;

જમાનાની રોકી લો વણઝાર.

બાપની સામે બેટડો બોલે, લાજ ન રાખે લગાર, 

સગાં ને સ્નેહી સ્વારથ સંગી, ધર્મ ભુલે ઘરનાર, 

જમાનાની રોકી લો વણઝાર, 

પરણેતર પર પ્રેમ ન રાખે, પરનારી પર પ્યાર, 

આંસુ ખેરે અબળા, પાછો મારે ઉપરથી માર, 

જમાનાની રોકી લો વણઝાર, 

બહેન બનેવી તોજ બોલાવે , ખીસામાં કલદાર , 

નિર્ધન જાણી મામા-માસી બંધ કરી દે બાર, 

જમાનાની રોકી લો વણઝાર, 

મતલબિયા જન આંગણે આવે સુખમાં સો સો વાર, 

દુ:ખ પડે ત્યારે નથી સ્વારથના  સરદાર, 

જમાનાની રોકી લો વણઝાર, 

ભુખ્યા પેટે ટળવળે છે પાડોશીનાં બાળ, 

બંગલામાં રહેનારાં એની લેતાં નથી સંભાળ, 

જમાનાની રોકી લો વણઝાર, 

ગરીબ ખેડુત આંટા મારે પંચાયત ને દ્વાર, 

દામ ન આપે તો દપટી રાખે તગાવીને તુમાર, 

જમાનાની રોકી લો વણઝાર, 

વગ ન હોય તેનો વારો ન આવે, અરજી કરે અપાર, 

મામા-માસી ના ને નોકરી મળે, એવી સમજુ છે સરકાર, 

જમાનાની રોકી લો વણઝાર, 

ધન મળ્યું તો ય નથી ધરાતા, કરે છે કાળાંબજાર, 

માનવી! તું થા સાચો માનવ, પ્રભુ કરે છે પોકાર, 

જમાનાની રોકી લો વણઝાર, 

       { ફુલો વેરાણાં ચોક માં }

  ~ ભક્ત કવિ શ્રી ત્રાપજકર દાદા ~ 

      સંપાદક :- રાજુભાઈ ભટ્ટ 

             મો:-9824474306