શ્યામળીયા નો ચોપડો ચોખ્ખો.... { ફુલો વેરાણાં ચોક માં }

     શ્યામળીયા નો ન્યાય છે નોખો, 

     રાખ્યો  એણે   ચોપડો  ચોખ્ખો.

દશ દિશાએ સુરજ ચાંદાના, પહેરા રોજ રખાય ;

પવન આવી ને નોંધ કરાવે, નામું એવું નોંધાય ;

           સરવૈયા રોજ છપાતા, 

            હિસાબો રોકડા થાતા. 

ઉચ્ચતાનાં અભિમાનથી રાખી, આકરી આભડછેટ ;

બ્રાહ્મણ કરે  નોકરી આજે , હરીજનોની હેઠ ;

          ભંગીના હાથનું  ખાતા, 

          હિસાબો  રોકડા  થાતા. 

ન્યાત પટેલ બનીને મુક્યા નિર્દોષને ન્યાત બહાર ;

એનાં જ ઘરમાં દીકરા લાવે કોલણ કાં કુંભાર ;

          મોટાનાં  મન મૂઝાતા, 

          હિસાબો રોકડા થાતા. 

ખોટા ચોપડા ને ખોટા નામા, ખોટ ને ખોટ દેખાય, 

કાળાંબજારે તારવ્યો નફો, ટેકસવાળા તાણી જાય ;

          ઊપરથી  દંડ  ભરાતાં, 

          હિસાબો રોકડા થાતા. 

વિધવા દીકરી ખુણો પાળે ને બાપનાં લગન થાય ;

બાપની દેખતાં દીકરી આજે ફાવે તેને જાય ;

          વાવ્યું એના લેખ વંચાતા,

           હિસાબો   રોકડા  થાતા. 

પાનું પૂરું થાય નામાનું, હરિ કરે છે હિસાબ ;

વખત આવ્યે વંચાઇ જાશે, કરણી કેરો જવાબ ;

      ધરવો    ના    કોઈએ    ધોખો, 

      શ્યામળીયા નો ચોપડો ચોખ્ખો 

       { ફુલો વેરાણાં ચોક માં }

  ~ ભક્ત કવિ શ્રી ત્રાપજકર દાદા ~ 

      સંપાદક :- રાજુભાઈ ભટ્ટ 

             મો:-9824474306