ચિતના ચોરામાં ચોવટ ચાલતી, પંચમાં આતમ પટેલ;
મન ને બુદ્ધિને ઝગડો જામિયો, આણવા બેઠા ઉકેલ!... ચિતના ચોરામાં
મતિ રે કહે કે, મન તું માળવે, ફોગટ ફરે છે ફટકેલ;
દુનિયા બધીનાં બાંધું દોરડાં, છટકી જાતું છકેલ!... ચિતના ચોરામાં
મનડું બોલ્યુ કે, બુદ્ધિ! બોલ મા રેઢી ફરે છે રખડેલ;
દુનિયા આખીને તું ડોલાવતી, ખેલે એવા તું ખેલ!... ચિતના ચોરામાં
કાયા ત્યાં કંપીને ફરીયાદ કરે, વાટ માં કાંટા વાવેલ;
ભોગના નામે હું રોગ ભોગવુ, સંગત ભુંડાની કરેલ!... ચિતના ચોરામાં
ફડચો લખીને કાગળ ફાડિયો આતમે આપ્યો ઉકેલ;
ભાગ્યો હું તેદિ' ભુંડા હાલ છે, માંહ્યલા ત્રણે ધોજો મેલ.... ચિતના ચોરામાં
''આતમવાણી''
{ ભક્ત કવિ શ્રી ત્રાપજકરદાદા }
સંકલન :- રાજુભાઇ ભટ્ટ
મો :- 9824474306
લ
No comments:
Post a Comment