વાલાજીનો કાઢીશ માં તુ વાંક...... '' બંસરી મિઠાસ ભરી''

વાલાજીનો કાઢીશ માં તુ વાંક;

કાઢીશ માં તુ વાંક,તારી કરણી આડો આંક ..... વાલાજીનો.

ધન મળ્યું તને જોબન મળ્યું પછી મૂછ ને દેતો વળાંક;

નબળા જનના લીધા નિસાસા, રાજા મટી થયો રાંક ..... વાલાજીનો.

પંડ પરસેવો કંયાઈ ન પાડયો, પારકો લણીયો પાક;

લખપતિ થાવાને તેં તો લાખોને મારી લપડાક ..... વાલાજીનો.

ઝુંપડીઓને જગવી દીધી,બંગલે ગોઠવ્યા બાંક;

મણે તોળાતો માનવીમાં,હવે નર થયો નવટાંક ..... વાલાજીનો.

રામ રતન તારે ખેતર પડયુ,તેં તો વાવ્યુ કાંકનુ કાંક;

લાણી લઈ ને ખળે ઊપજશે,રતન બદલે રાખ ..... વાલાજીનો.

           '' બંસરી મિઠાસ ભરી''

      { ભક્ત કવિ શ્રી ત્રાપજકરદાદા }

        સંપાદન :- રાજુભાઈ ભટ્ટ